इस पोस्ट के माध्यम से हम जानेंगे दवले कुजूर (Dawle Kujur) से जुड़े महत्वपूर्ण एवं रोचक तथ्य जैसे उनकी व्यक्तिगत जानकारी, शिक्षा तथा करियर, उपलब्धि तथा सम्मानित पुरस्कार और भी अन्य जानकारियाँ। इस विषय में दिए गए दवले कुजूर से जुड़े महत्वपूर्ण तथ्यों को एकत्रित किया गया है जिसे पढ़कर आपको प्रतियोगी परीक्षाओं की तैयारी करने में मदद मिलेगी।
दवले कुजूर(Dawle Kujur)
दवले कुजूरस गहि कुन्दरना 1921 ई० चान न मंन्जकी र:अचा। इस गहि अदि्द पद्दा लोहरदगा जिला नुम मनी। तग्गियो गहि नामे मु. प्रभुदासी पन्ना अरा तम्बस गहि मु. हनुक्ख़ कुजूर तली। दवले कुजूरस तंगियो तम्बर गहि मूंदता खद्दस र:अचस। तम्बस लुथरन कलीसिया ता ओन्टे असिस्टेन्ट हेडमास्टर रहचस।
दवले कुजूरस सन्नितिम कुँड़ख़र गहि उज्जना- ओक्कनन अजगुत हेद्दे ती एरा बुझर:आ लगियस । परब तिहार का नेत नेग मनो बीरी नितकिम संगे संगे र:आ लगियस। मानीम आस गहि जिया नु क्रिस्तान का सरना भइयोर गे एक:अम किता गहि मलदव तीना खाड़ना मल र:अचा।
दवले कुजूरस मेट्रिक गहि बीढ़नन कट्टियस दरा I.A अउर BA नना गे बी. एन. कॉलेज पटना केरस। आई.ए. गहि बिढ़नन का कट्टियस अउर बी. ए. नुं टूड़ना बचना ओरे नंज्जस मुंदा पूरा नना पोल्लस, दरा आ मझही नुम बिहार सरकार गहि छापा खाना नु रीडर गहि ओहदा नु हुँ नलख नना लगियस।
दवले कुजूरस गहि टुड़ना बचना अंगरेजी पत ती मंज्जकी रःअचा। मुन्दा कुँड़ुख़ कत्था अरा नेगचार ती आस में अकय चोन्हा रःअचा। कुँड़ुख़ कत्था, कत्थपडी अरा कुँड़ुख़ारिन मइया परदःआगे अकय चिहुट नना लगियस अउर अदिनुम तंग्हय धरम नलख़ बुझरःआ लगियस। आ बेड़ा नु आस संग्गे रऊ लोलीन कुजूर अरा सांति कुल्लू गहि कत्था तेंग्गना ती आस उल्ला न माख़ा कत्थडण्डी अरा साहे डण्डी टूड़ना बचना अरा पाड़ना नु बेड़ा चिआ लगियस। इंवदा गुट्टि का ओन्ना मोख़ना गहि हूँ फिकिर मल र:अचा। आलारिन ब:आ लगियस का कत्यडण्डी, टूड़ना बचना अरा पाड़ना ती दिम कूल उड़ई काली। ओन्ना मोख़ना गहि एन्देर फिकिर, आस एन्ने हुँ ब:आ लगियस का अंगरेजी बचआ टूड़आ अरा कच्छनखरःआ दरा अंगरेजी नु घोखःआ अउर अन्नेम कुँड़ुख़ नु कच्छनखर:आ. टुड़ा बचःआ दरा घोखआ। दवले कुजूरस कुँड़ुख़ कत्थन अरा कत्थपंडीन परदःआना नु चन्दो- बीड़ी लेखा आलस र:अचस मानिम आस धरमेस गहि अकय ओहमा पाड़ा लगियस एकाने का आस गहि टूड़का पड़िका “मुन्ता पूँप झुम्पा” कत्थडंडी पुथी ती दहदह मनी काली नमूद कत्थडंडी :-
"डिढ अरा नेम्हा चिहुट ए धरमे !
एन नेएदन,निंग तरा नीन एंगन नतगा,
संवसेन कमऊ नेएदन ।"
दवले कुजूरस एका बेड़ा ए. जी. ऑफिस नु नलख़ नना लगियस आ बेड़ा नुम "मुन्ता पूँप झुम्पा" नामे कुँड़ुख़ कत्थडण्डी पुथी टूड़र 1950 ई० चान नु बीड़चस। इ कत्थडण्डी पुथी नु कुँड़ख़र गे तंगहय जिया ता लोला चोन्हन ओथरस की एदकस र:अदस। अक्कुनता कत्थडण्डी टुड़ु पाड़ुर नु दवले कुजूरस गहि जुड़ी ने हुँ मल एथरनर। मानीम अयंग कत्थन पदरआगे इस गहि अकय कोंहा ख़ेख़ा रःई। मुन्ता पूँप झुम्पा कत्थडण्डी पुथी ता जुड़ी पेल्लो, नेएदन, रासी सुक्खे गहि, लोला रागे अरा एंग्हय जुड़ी गहि पस्ती नु टीपन गड्डी जिया ती एरा ख़ने लग्गी का आस गहि टूड़का पड़िका बक्क अरा घोख नु निदी रासी दिम निंदकी र:ई । एकासे का :-
"मेरख़ा मइय्या बदाली मुर्रय्या चाड़िया,
झिमिर झिमिर चेंप चि:अर झरियन लॉड़िया।
टोड़ंग चुब्बा नलिया तूकिया, पाड़िया,
पिंजा पिंजा जुड़ी गहि नामेनिम मीख़या।"
दवले कुजूरसीन अंगरेजी भख़ा ता कत्थडण्डी टूड़र लार्ड वासरायन, कोट्स. वार्डसवर्थ अरा विलियम सेक्सपियर गुट्ठियर ती जुड़ी नना ओंगदत। एकाने इर गहि कत्थडण्डी नु एम्बा रासी ती निंदका, जियन मोहना खुशमारना अरा की-रना की-रना जियन सालना ताका नु एम्बा सारना कत्था ती निंदका र:ई अन्नेम दवले कुजूरस गहि मुन्ता पूँप झुम्पा कुँडुख कत्थडण्डी नु र:ई।
दवले कुजूरस अउर ओन्टे कोंहा नलख़ नना लगियस मुन्दा पूरा मना पोल्ला। इस तंग्हय घोख़ अरा चिहुट ती “रूबायत ऑफ उमर खय्याम” गहि कुँड़ुख़ नु तरजुमा नना लगियस मुंदा आ बेड़ा नुम नड़ी चेंप इदा बीमार ख़तरस की चोआ हुँ पोल्लस दरा 1953 ई. चान नु संवसे उल्ला में खन्नन मिख़यस चिचस इदा जियान मंज्जस केरस। मानीम कुँड़ुख़ तरजुमा गहि नलख़ पूरा मन्ना काना होले कुँड़ुख़ कत्थडण्डी चन्दो बींड़ी बेसे बिल्ली ननो पहें।
इस गहि टूड़का डण्डी अरा कत्थपण्डी गे गुट्टि बोलता, बिज बिनको अरा धुमकुड़िया चन्दो अतख़ा कागद गुट्ठि नु ढेर बग्गे चिपरकी र:ई।
संदेश
